Genealogiese navorsing is dinamies en lewend. Die beginpunt verskuif gedurig en die werk kom nooit klaar nie. Genealogie verskil van gewone geskiedenis in die sin dat dit die lewens van die genealoog se tydgenote en voorvaders gelyktydig aanspreek. Genealogie raak 'n komponent van die lewe van 'n persoon wat dit sy erns maak om sy afkoms vir sy nageslag te bewaar, en wat wil verseker dat sy eietydse lewensverloop vir sy kinders opgeteken word.

Ferdie en Elise doen sedert Januarie 1975 genealogiese navorsing in hulle vrye tyd. Hierdie webblad vorm die raamwerk van 'n groot hoeveelheid genealogiese materiaal wat oor dertig jaar, 'n leeftyd van toegewydheid aan die onderwerp, ingesamel is. Dit bevat 'n baie klein gedeelte van die inligting in hul persoonlike familie-argief.

Ferdie is bewus van slegs een ander publikasie wat spesifiek gerig is op die Jansen-familie van Suid-Afrika.  Dit is die outobiografie van Ds. Johannes Christoffel (Johan) Jansen van die Strand, naby Kaapstad.  Hierdie massale werk bevat ‘n skatkis van genealogiese inligting vanuit Johan se tak van die familie.  Dit vertel die verhaal van sy lewe vanaf sy geboorte op Vlakwater, die familieplaas naby Viljoenskroon, tot by sy tagtigste verjaardag in 2004. In ’n wyer sin beskryf Johan die lief en leed van sy familie oor meer as honderd jaar op ’n wyse wat die leser permanent deel maak van ’n gesin wat ’n besonderse pad geloop het.  Die boek beslaan meer as 250 bladsye en is ryklik geïllustreer met meer as 250 foto’s.  Ferdie dra graag spesiale dank oor aan Johan en sy eggenote Ena, vir hulle besondere bydrae tot hierdie webblad..

Bo en behalwe sy outobiografie, het Ds. Johan Jansen ook sy familie-stamboom in registervorm laat druk.  ’n Ander omvangryke stuk genealogiese navorsing is deur Gerhard Wolvaardt van Pretoria gedoen.  Gerhard konsentreer eintlik op die Wolvaardt-  en Geyser-families, maar het in die proses ook sy moeder (Loekie Jansen) se Jansen-familie nagevors.  Gerhard het ’n omvangryke genealogiese databasis met meer as 2800 name daarin geskep en dit groei steeds.  Beide Johan en Gerhard se Jansen-registerinligting word met dank in die nasionale register opgeneem. 

Besondere bydraes is ook vanaf Barry Jansen op Ermelo en Drieka Roos van De Aar ontvang.  Barry het ’n mooi bydrae gemaak deur sy eie familie op te skryf en het genealogiese inligting wat hy vanaf Christiaan Jansen van Graaff-Reinet ontvang het met Ferdie gedeel vir insluiting in die nasionale register.  Drieka het besondere werk gedoen om die nageslag van Jacobus Petrus Jansen van Willowbank, Philipstown en sy agtien kinders op te teken.  Drieka se databasis groei steeds en sal meer volledig beskikbaar wees wanneer die nasionale register in Junie 2006 weer bygewerk word.

’n Baie besondere bydrae is van Michael Clemens, Ferdie se medewerker in Neustadtgödens, Oos-Friesland, ontvang.   Michael was verantwoordelik vir ’n dramatiese deurbraak deurdat hy daarin geslaag het om die besonderhede van stamvader Zirke Jansen se ouers in Oos-Friesland op te spoor.  Hiervolgens kan die Jansenfamilie van Suid-Afrika nou sonder enige twyfel daarop aanspraak maak dat hulle van Duitse afkoms is.  Besondere dank word dus ook aan Michael oorgedra vir sy bydrae tot die nasionale Jansenregister en hierdie webtuiste.

Ferdie verneem graag van besoekers aan die webtuiste indien hulle van ander Jansen publikasies bewus is. Die inligting op hierdie webtuiste word op 'n feitelike basis aangebied en daar is deurgaans gepoog om nie afleidings of persoonlike interpretasies as die werklikheid deur te gee nie. Bronverwysings is beskikbaar en besoekers aan die webtuiste is welkom om hieromtrent navraag te doen. Die gedagte is dan ook om, namate die webtuiste groei, uiteindelik 'n volledige bronnelys in die vorm van 'n skakel aan te heg. Daar is van verskeie medewerkers gebruik gemaak tydens die skryf van die artikels op die webblad en Ferdie is bereid om op die webtuiste erkenning te gee indien die mening bestaan dat daar nie voldoende melding gemaak word van sodanige eksterne navorsing nie. Die inligting op hierdie webtuiste mag nie sonder toestemming gekopieer word, of vir enige kommersiële doeleindes aangewend word nie.

Alle Suid-Afrikaanse Jansens is welkom om hulle eie familie-besonderhede aan te bied vir opname in die nasionale Jansen-register. Kontak asseblief met vrymoedigheid vir Ferdie in hierdie verband sodat die nodige vorm en vraelys aan u gestuur kan word.

"Doing genealogy is not a cold gathering of facts but, instead, breathing
life into all who have gone before.  We are the storytellers of the tribe.
All tribes have one.  We have been called, as it were, by our genes.  Those
who have gone before cry out to us, "Tell our story!"   So, we do."

………….Author unknown